EFEverde en Galego

As probas de sistema identifica quenllas pola aleta empezarán en outubro

As probas de sistema identifica quenllas pola aleta empezarán en outubro Fotografía de arquivo. EFEverde

Varias universidades e institucións de investigación de diversos países comezarán no outubro próximo a probar o software vigués ISharkFin, que identifica 16 tipos de quenllas e mantas raia polas aletas e detecta a pesca de especies ilegais, segundo informou a Universidade de Vigo.

Trátase dun proxecto do departamento de Ecoloxía e Bioloxía Animal da Universidade de Vigo para a organización das Nacións Unidas para a Agricultura e a Alimentación (FAO), en colaboración coa Convención sobre o comercio internacional de especies ameazadas da fauna silvestre e a flora.

O profesor Cástor Guisande, director da investigación, explica que esta ferramenta permite coñecer as especies de escualos que diferentes frotas pesqueiras capturan en diferentes partes do mundo e, a un tempo, frear o declive de determinadas poboacións e controlar as súas capturas.

En España, é obrigatorio descargar en porto as quenllas enteiras, para ter plena seguridade de que especie se captura, aínda que noutros países se fai xa cos exemplares despezados.

Por tal motivo, a FAO encargoulle ao equipo investigador vigués o desenvolvemento dun programa de identificación a través das aletas.

Unha vez que finalice o período de probas comezará a distribución do software en versión aberta, ao alcance de calquera inspector de porto, axente de aduana, confraría ou comerciante.

O obxectivo é recibir en xullo de 2015 a certificación oficial da FAO, de xeito que o software ISharkFin sexa de uso recomendado, aínda que non obrigatorio.

Trátase dun sistema baseado en técnicas de aprendizaxe automática para identificar as aletas pola súa morfoloxía.

O usuario toma unha foto da aleta e selecciona algunhas das súas características para poder saber automaticamente de que especie se trata.

O tempo estimado do proceso é inferior aos cinco minutos.

Hai un ano, expertos da FAO visitaron Vigo para avaliar o novo programa e darlle o seu visto e prace á continuidade do proxecto. EFEverde




Secciones:        
Un equipo de periodistas especializados en periodismo e información ambiental de la Agencia EFE www.efeverde.com y www.efefuturo.com