EFEverde en Galego

Os traballadores sospeitan que Urbaser quere que “o conflito continúe aberto”

  • Once traballadores foron despedidos pola empresa desde o inicio desta folga e outros sesenta e seis foron amoestados con sancións económicas

Os traballadores sospeitan que Urbaser quere que A folga do servizo de limpeza e recollida do lixo en Lugo. EFE

O secretario do comité de empresa de Urbaser, Julio Pacio, acha que, "por intereses que aos traballadores se lles escapan", a empresa procura que o conflito laboral que derivou na folga do servizo de limpeza e recollida do lixo en Lugo "continúe aberto", co que demostra que lle "importan moi poucos" os seus "empregados e os veciños".

Nunhas declaracións á EFE, Julio Pacio subliñou que esa intención da empresa ficou claramente demostrada onte, despois de que as negociacións entre ambas as partes quedasen “definitivamente suspendidas”, segundo informou a propia concesionaria, despois dunha reunión que durou máis de sete horas, convocada polo mediador do Consello Galego de Relacións Laborais.

Segundo o portavoz do comité de empresa, “a parte social” aceptou a “proposta que puxo sobre a mesa o mediador para desbloquear o conflito”, porque mesmo foi aprobada pola propia asemblea de traballadores, a pesar de que “difería moito” das demandas formuladas inicialmente polos empregados de Urbaser en Lugo.

Desde o inicio deste conflito laboral, insistiu, o cadro de persoal foi “mudando as súas posturas”, sempre coa esperanza de “chegar a un acordo” que permitise sacar adiante o convenio colectivo e pór fin a unha folga que dura xa un mes e dous días.

Porén, a pesar de aceptar esa proposta que o mediador puxo sobre a mesa para solucionar o conflito, “foi a empresa a que volveu bloquear a negociación”, ao se negar a “falar de despedimentos e de sancións”, dúas condicións que a parte social considera ineludibles para pechar calquera acordo.

Once traballadores foron despedidos pola empresa desde o inicio desta folga e outros sesenta e seis foron amoestados con sancións económicas, polo que os sindicatos entenden que non pode haber ningún acordo se a empresa non retira esas medidas disciplinarias.

Por iso, Julio Pacio insistiu en que “a quen interesa este conflito é á propia empresa. Ela saberá por que”.

De feito, subliñou que Urbaser “está levando o conflito como ela quere, inclusive mediaticamente”, mais os traballadores están dispostos a “continuar coa folga “, porque “cen por cento do cadro de persoal está unido” e disposta “a loitar por un convenio digno”.

Os sindicatos convocaron para este mediodía unha nova manifestación que partirá da casa sindical, obrigará a cortar o tránsito na Rolda da Muralla e terminará perante o concello. EFEverde




Secciones:        
Redacción EFEverde
Un equipo de periodistas especializados en periodismo e información ambiental de la Agencia EFE www.efeverde.com y www.efefuturo.com