EFEverde en Galego

Medio millón de euros para rexenerar costa galega fronte ao cambio climático

Medio millón de euros para rexenerar costa galega fronte ao cambio climático Pontedeume (A Coruña). EFE/Cabalar

EFEverde.- O litoral galego acapara as maiores partidas en protección e rexeneración costeira, con máis de medio millón de euros, na estratexia de adaptación ao cambio climático dotada con preto de 10 millóns de euros, presentada pola ministra de Agricultura, Alimentación e Medio Natural, Isabel García Tejerina.

A estratexia, centrada en protexer a costa do quentamento e restaurar os estragos xa causados, contén 40 proxectos dotados de 9,5 millóns.

Entre eles figuran partidas de 240.000 euros para a costa da Coruña, de 200.000 para a de Pontevedra e de 75.000 para a de Lugo.

O denominado PIMA Adapta, un plan de impulso ao medio natural para a adaptación ao cambio climático, é o primeiro paquete de medidas que España dedica a paliar danos en diferentes partes do país e a prepararse ante os que previsiblemente están por vir.

“España é un país moi vulnerable ao cambio climático pola súa condición de península”, subliñou García Tejerina, quen asegurou que esta estratexia nace “con vocación de continuidade” e co obxectivo de “minimizar impactos” para que “nada poña en risco o crecemento verde” do país.

O plan conta con 12,1 millóns de euros para 46 accións que empezarán a desenvolverse en abril e que, segundo a ministra, foron seleccionadas tendo en conta “as zonas onde hai estudos que din que hai que actuar” prioritariamente.

A maioría dos proxectos están repartidos entre as comunidades de Cantabria, Asturias, Galicia, País Vasco, Cataluña, Comunidade Valenciana, Murcia, Andalucía, Baleares, Canarias, Ceuta e Melilla.

Proxectos costeiros

As obras inclúen traballos de rexeneración de praias danadas polos temporais, restauración de dunas, marismas e zonas húmidas, estabilización das partes baixas dos esteiros e protección para reducir a erosión.

Parte dos proxectos costeiros irán destinados a mellorar a investigación e o coñecemento en adaptación ao cambio climático e a accións de concienciación.

Garcia Tejerina dixo que o Goberno ten xa en fase de avaliación ambiental a estratexia de adaptación da costa, que prevía a reforma da Lei de costas aprobada en 2013. EFEverde




Secciones:        
Un equipo de periodistas especializados en periodismo e información ambiental de la Agencia EFE www.efeverde.com y www.efefuturo.com