Ambas as dúas entidades advirten das "carencias" en materia de plans de uso e xestión, das brañas incluídas no convenio internacional Ramsar, e cita o caso das de Ribadeo, Ortigueira, Valdoviño, Corrubedo e Umia-O Grove-Carreirón.
Tamén denuncian que hai "mala planificación" no ámbito do urbanismo e acuicultura e incluso situacións "fóra de control" en zonas costeiras.
Ademais, critican a "contaminación agrogandeira difusa" e a "cavadura de terras marxinais inundables" co obxectivo de "cazar primas" da Unión Europea, en alusión aos subsidios.
Por último, observa que hai "efectos directos e indirectos dos lumes" forestais sobre as brañas en zonas montañosas.
As dúas entidades de vocación científica lamentan ademais a carencia na lexislación galega sobre auga, por considerar que "ignora as zonas húmidas e non lle dedica nin un só artigo á restauración dos sistemas hidrolóxicos degradados na actualidade, nin sequera nas zonas de especial protección das rías "e confórmase" con que "non empeore" a calidade da auga.
Así mesmo, repróchanlles á Consellaría de Medio Ambiente e ás confederacións hidrográficas dos ríos Miño-Sil e Douro o feito de que "non exercen as súas competencias para garantir a conservación e o uso racional das brañas e dos seus recursos", segundo os compromisos contraídos por España na convención Ramsar. EFE.
