Hernández dixo que o de Corrubedo é un dos espazos costeiros máis significativos do patrimonio natural galego e o único Parque Natural de Galicia de ámbito litoral, informou a Xunta nun comunicado.
O departamento de Medio Ambiente lembra que é un espazo que recibe a visita dunhas 300.000 persoas ao ano e, a pesar do seu pequeno tamaño, non chega ás 1.000 hectáreas, alberga unha gran variedade de ecosistemas, hábitats e especies de fauna e flora representativos do litoral, recollidos na Directiva Hábitats, Directiva Aves e Catálogo Galego de Especies Ameazadas.
Neste ano celébrase a 41ª edición do Día Mundial das Zonas Húmidas, que procede da convención sobre estes espazos de importancia internacional, que naceu en 1971 na cidade iraniana de Ramsar e entrou en vigor en 1975.
A súa misión é a conservación e o uso racional destes ecosistemas mediante accións locais e nacionais, grazas á cooperación internacional.
O inventario de zonas húmidas de Galicia inclúe 1.131 cunha superficie de 70.673,3 hectáreas, mais frecuentes nos sectores litorais, as depresións sedimentarias interiores e as áreas de montaña sublitorais e centrais.
A Comunidade Autónoma conta, ademais, con cinco zonas húmidas declaradas como Sitio Ramsar, cun total de 7.698 hectáreas: ría de Ribadeo; ría de Ortigueira e Ladrido; lagoa e areal de Valdoviño; Complexo das praias, lagoa e duna de Corrubedo; e Complexo Intermareal Umia-O Grove, A Lanzada, Punta Carreirón e lagoa Bodeira. EFE
jl/jrs
