Para os ecoloxistas, "os nosos gobernantes atrasan decisións, non saben ou non queren protexer adecuadamente as zonas húmidas e non impiden o incumprimento continuado da lexislación que as protexe".
Como exemplos, a SGHN sinala nun comunicado os casos da lagoa da Frouxeira ou a situación da ZEPA da Limia.
Da primeira, resalta que os problemas de elevación excesiva da lámina de auga veñen do cambio de usos tradicionais e diversas actuacións que alteraron a dinámica da lagoa e o seu funcionamento natural, e lembra que xa hai dous anos que advertiu destes riscos e demandou un estudo, que "nunca se realizou".
A sociedade lembra que se trata dun sistema catalogado, entre outras figuras, como Zona Húmida de Importancia Internacional e está incluída na lista de zonas húmidas españolas de Ramsar.
Da zona especial de protección de aves da Limia, denuncia que case un mes de concluír o prazo de dous anos estabelecido legalmente para a súa publicación e entrada en funcionamento do plan de xestión da ZEPA, aínda non se deron estes pasos. EFE
